اطلق العنان لمخيلتك ...حررها ...ارنا احلامك ....و شارك معنا

[نار البحر]

الفكرة خطرت في بالي بعد ان تعرفت الى الكثير من الاصدقاء من خلال هذا المنتدى
كلماتنا هي من تمثلنا و نتعامل مع بعضنا هنا بدون التاثر باي مظهر خارجي
فكل اناء ينضح بما فيه
و كلنا ربما يتخيل شكلا معينا للشخص الذي يحاوره … يرسم له صورة في مخيلته
و هنا تاتي الفكرة
كيف تتخيل من تتحدث معهم من تناقشهم
هذا الموضوع هو بمثابة زاوية لاطلاق العنان لمخيلتنا لكي نرسم بالكلمة و نصور الاشخاص الذين نتحدث معهم

لن تكون البداية من عندي
ساترك لكم المجال لتكون البداية معكم
تحدثوا عن شخصيات المنتدى و كيف تتصورونها
بانتظاركم

تحياتي

ملاحظة:
وضعت الموضوع هنا
لان الموضوع يتحدث عن شخصيات المنتدى
و لاعضاء المنتدى سحرهم ايضا

sh:hi

[SLM]

السلام عليكم ورحمة الله وبركاته

لا نخليني أبحر هلق .. وزعل الشباب ..

أنا أتخيل أسامة برد مثلا .. ماشي :
طوله 175
وزنه 80
يميل إلى لبس الجنز مع قميص .. (كيجوال)
شعره مفروق على جنب .. ولونه بني
والعيون بني .. والبشرة حنطية

منيح هيك

هذا محاولة تخيل من ناحية الشكل ..
بقا إذا طلعت غلط .. مو مشكلة .. بيعذرنا أبو السوم

بس إن شاء الله تطلع صح .. لحتى ما أفقد الثقة بمخيلتي

[اللاذقية]

مرحبا اخ نار البحر بدي قلك كيف بتخيلك
طويل يعني شي 180 وزنك يعني كونك بالغربة هلق شي 60 بترد شعرك لورى بتلبس نضارة مو كتير سمكية ما بتلبس جينز أبدا بتحب الرسمي كتير هادي ورايق على الأخير وبتقرى كتير
أما أخي سلم
دقنو طويلة كتير كتير وبيلبس عباية وبيقرى ديانة كتير كتييييييييير
وعصبي بس قلبو طيب قصير وسمين
أسامة برد جنتل الشاب الأنيق كمان طويل ويعني صحتو معتدلة بيلبس جينز
مربي شوارب
هيدا كل شي حتى الان
ما حدا يزعل مني أماني
باااي

[نار البحر]

و عليكم السلام و رحمة الله و بركاته

اخي سلم

يعني صراحة انا ما بعرف كيف شكل اسامة برد و لكن اله صورة في البوم شبابلك و هو صغير

انا رح يجي دوري و رح اكتب عن الاعضاء و كيف بتخيلهم

و لكن يعني يا اخي ما خطر في بالك غير اسامة

خبرنا عن الكل اذا لسا في حدا ببالك

و طبعا الصبايا غير مثتثنين

يالله يا جماعة خبرونا كيف بتتخيلوا بعض شخصيات المنتدى

و اخي اسامة يا ترى شو رايه

تحياتي

[اللاذقية]

عفوا للمقاطعة بس بدي اتخيل كيف شكلها الأخت شباب دائم
شباب دائم يعني عمرها شي 40 سنة شخصية قوية قصيرة ونحيفة يعني قطعتا ناعمة بتحب الاجتماعات
مرة تانية بلا زعل

[نار البحر]

الاخت اللاذقية عذرا لم ارد عليك
يبدو اننا طرحنا لاموضوع في نفس الوقت
بالنسبة لشكلي لا تعزبي حالك موجود في البوم شبابلك ضمن صور الاصدقاء و لا يهمك هي لمحة بسيطة

الطول 175
الوزن 75
لون الشعر اسود
العيون اخضر
بلبس جنز
بحب المطالعة
و طبعا بلبس نظارة و كتير رقيقة و مو سميكة معي ضعف بسيط ربع درجة
اما الهدوء موجود
بس وقت النرفزة يا لطيف و لكن بصفا بسرعة
طيب لنا عودة مع شخصيات جديدة

عطونا رايكم

[نار البحر]

على فكرة انا رح اتعرض بهل الموضوع للجميع و رح اكتب عن الكل
و لكن على دفعات

تشاو
sh:hi

[Haloul]

انا ما بحب اتخيل حدا......

و لا مرة تخيلت ان احد الأعضاء هو سبور او يميل الى الرسمي او سمين او ذو جسم رياضي او اشقر او اسمر...

حتى عندما يحاول خيالي ان يرسم صوراً لبعض الأعضاء فإني اوقفه بحزم.....لا ادري لماذا..

و لكن هناك القليل من الأعضاء اللذين رغم عدم وجود صورة مسبقة لهم في خيالي.. فإني عندما التقيتهم او رأيت صورهم شعرت ان العضو الذي اعرفه ليس صاحب هذه الصورة قطعا...

مرة اخرى الأمر لا يتعلق ابداً بأني كنت اتوقع ان ذلك العضو اكثر و سامة او غير ذلك.. لكنه شعور خفي بأن الشخص الحقيقي و العضو الذي عرفته في المنتدى هما شخصان منفصلان..

العكس تماماً يحدث مع بعض الأعضاء.. عندما التقيت بهم فعلآ احسست اني التقيت بهم من قبل كلما وجدتهم في المنتدى و لم اشعر بأي غربة عنهم.

[shababdaim]

هههههههههههههههههههههه


ما رح رد اعليك اختي الأذقيه :D


رح خلي غيرك يحكي :D

هههههههه


قال قصيرة قال sh:ohmy انا قصيرة ؟؟؟؟؟؟؟؟؟؟



يلا يللي بعدو

وانا راجعه لوصف بعض الاخوة والاخوات

[نار البحر]

على فكرة يمكن الاستعانة
بصور مشاهير او ناس معروفين

لتخيل الشبه بين اعضاء المنتدى و بينهم

يعني مثلا جورية : انا بتوقع انها بتشبه جوليا روبرتس بس على صحة اكتر

و شباب دائم : بتوقع انها بتشبه ماريا كيري بس على انحف

و اسامة برد : جمال سليمان

و سلم : قريب على ابن لادن

و مين كمان طيب يبقا بنكمل

[SHANT]

موضوع مثير للاهتمام
و اخي نار البحر انا ما بقدر اتخيلك
ببساطة لاني شايف صورتك بالابوم ;)
اما بقية الاعضاء اليوم المسا بفكر وبكرا بردلكم الجواب sh:hi

و على فكرة هي مشاركتي رقم 500 والاحلى انو بموضوع اخي نار البحر

[tiger4u]

موضوع حلو كتير أخي نار البحر

أنا دائما بتخيل اسم الشخص ( لا إراديا ) بمجرد قراءة اسمه وكنت حب اتعرف فعليا عالشخص واعرف صورته وجائت الفرصة في معرض الشام 2003 حيث تواعد بعض الأعضاء للالتقاء عند أمير الشام حيث كان مشاركا بالمعرض

كنت قد رسمت لكل واحد من الشباب صورة معينة ولكن كم كانت درجة التخيل صحيحة

باعتقادي أنها كانت حوالي عشرة بالمية بس ... بس واحد أو تنين من الشباب طلعو شبه الصورة يللي ببالي ... هي تجربتي الشخصية بهالمجال ومع إنها تجربة فاشلة بس رح شارك واتخيل بعض الأعضاء بمشاركة قادمة

بس في شغلة حابب احكيلكن عنها
صارت معس من فترة تجربة عكس الفكرة يللي طرحها نار البحر ... يعني كيف ؟
شفت عضو بالمنتدى بمقهى إنترنت فاتح على شبابلك ( ما رح قلكن مين هوي )وسألتو إنته من اعضاء شبابلك فجاوب إيه بس أي عضو تتوقعني فقلتله : مو إنتة فلان . وتصوروا كان جواب صحيح .. يعني زبطت معي كيف ؟ ما بعرف

شو رأيكن ؟؟؟؟؟؟؟؟؟ :p

[GODFATHER]

موضوعك شيق وجميل جدا اخ نار البحر

وبدوري سأتخيل الادمن العام ..

فأنا اتخيله مثل فيدل كاسترو.. (ليس شكلاً طبعا) !! sh:ohmy

:cool: :cool:

--

اخي tiger4u بالنسبة للعضو اللي شفته بكافي النت ..

يعني تقريبا انا عرفته .. وشئ بديهي انه راح تعرفه فورا ..لانه سبحان الله اسم على مسمى !!!!! :D :D :D

[osama_brd]

يعني بحب أول شيء أتشكرك أخي جمال على هذا الموضوع ...

مشان مواصفاتي يعني قال SLM أني :
طوله 175
وزنه 80
يميل إلى لبس الجنز مع قميص .. (كيجوال)
شعره مفروق على جنب .. ولونه بني
والعيون بني .. والبشرة حنطية

كل مو ظابط أبداً إلا لون الشعر يعني نص نص ...:p

أنا طولي 183
وزني ؟؟؟؟؟؟ ما بدي احكي بس مو كتير تفكروني سمين يعني أنا ما شاء الله طويل :D
ما بلبس جينز أبداً ولا بحبه أبداً أبداً ويمكن ما لبست جنز من أكثر من 15 سنة
شعري مو فرق لأنه رافعه للخلف
اليعون خضراء بس غامقة شوي
البشرة بيضاء ...

يعني كله بالعكس :p :p ..

---------------
طيب أنا بتخيل SLM :
طوله بحدود 170 سم
نحيف ويميل للنحف الشديد
يظهر أنه أصغر من سنه يعني بسبب الوزن
شعره قصير نسبياً
يميل لسمرة اللون
----------------
شباب دائم :
طويلة ونحيفة
مبتسمة
اجتماعية



يعني هذه توقعاتي


أسامةsh:hi

[اللاذقية]

سلامت نار البحر
يعني موضوعك راح ياخد جائزة نوبل للسلام
عنجد شباب نحن وقت بنتخيل شخصية مو بهدف الإساءة ولكن بهدف المرح والتسلية
أختي شباب دائم لاتفهميني غلط بس حبيت هز الورد لشم ريحتو
بعدين وصف أخي جمال لبعض الشخصيات عجبني كتير
وخصوصا سلم بتشبيهو لابن لادن شو وينك سلم تعال رد
احترامي للجميع

[SLM]

السلام عليكم ورحمة الله وبركاته

. والله بعبد عن ما تخيلتك .. أهلا بك ..

بالنسبة لإلي .. رح شوف شو رأي الشباب لسه .. أذا حدا حابب يوصفني .

بس شكر خاص ل ((( نار البحر))

يلي شبهني بالشيخ أسامة .. وأنا أرجو أن أشبهه بقلبه وإيمانه ومنزلته التي أحسبه عليها ..

وللحديث بقيه .. سرقني الوقت sh:hi

[Sweet_Nany]

يالله راح علي عمو اسامة واااع << بكيت

ايه .. << سكتت

اجا دوري.. طبعا بعد ما اشكر نار البحر على الموضوع..

وبصراحة انا اتخيلت جورية حبيبة قلبي

الطول : طويلة شي 170 سم
الوزن : متوسطة لا نحيفة ولا سمينة
اللبس : تميل الى الرسمي كتير (( آكابرية ))
وبالنسبة للشعر انا ما اتخيلتو لانو دوما بتخيلها بالحجاب السكري
الوش اللهم صلي عالنبي شكوري..
البشرة بيضاء..
عيونها شهل..
وبصريح العبارة بحسها حلوة كتير والابتسامة ما بتفارقها

ما تزعلي مني ام الجوج ازا ما ركزت معي..

يالله الى اللقاء بالحلقة القادمة

اختكم

ام السوووس sh:eye sh:hi

[nice_queen]

اشكرك اخ نار البحر على طرح هذا الموضع
بس يعنى هل منطقى هل حكى
يعنى حتى لو قلتو الطول
والعرض
والوزن ....واللون ولون العيون .....
ولون الشعر
هناك شىء
بان مانتخيله ...لانستطيع كتابته
لان هناك تيب ..وشكل لكل وجه ...ولكل جسم
ولكل ....انسان شكل لايمكن وصفه ...
لان خلقه الله سبحانه وتعالى ....كانت بادق التفاصيل الصغيره والمتغيره
من شخص لاخر
بمجملها .......تكون الشخصيه النهايه للانسان
....
على كل الموضوع حلو ومسلى ...وتغيير شكل

مع تحياتى
اختكم
نايس كوين

[SLM]

السلام عليكم ورحمة الله وبركاته :

طيب وين الشباب ..

يبدو ماحدا بده يتخيلني .. لذلك أخبر معلومة .. انني أنا وأسامة تخيلنا بعض بخيال متقارب شوي ..
والواقع أننا كلانا فشلنا في ذلك ..
بينما نحن متشابهان في الواقع

أنا أبيض ..
طويل منيح .. أطول من أسامة
جسمي رياضي ..
ولحيتي طويلة
وشعري بني
والعيون عسلي
يقول أصدقائي بأني ذوهيبة .
لبسي .. متنوع الحقيقة .. في العمل بدلة او رسمي عامة .. وخارج العمل غالبا جينز أو شي سبور .. بلوزة ضيقة .. بنطلون عسكري .. هذا ما أحب .. وأحيانا بلبس الثوب الأبيض .. في الصلاة وفي دروس العلم ..
أميل للشخصية المقاتلة .. أحب الأسلحة جدا . مهووس فيها .. أحب كرة السلة والسباحة والرياضات العنيفة .. وأمارسهاجميعا .. ولكني في الواقع هادئ ومسالم جدا جدا .. يعني من أكثر من ستة سنوات لم أضرب أي إنسان خارج صالة التدريب .. ولا أتشاجر مع احد إلا نادر جدا ..

على فكرة أنا متزوج .. فلا حدى يخطبلي .. :D ***************


يعني أنا من زمان جاي عبالي اتخيل (هلول).. هلق أذا بدي أتخيلها من منطلق(مشرفة متعسفة) رح تطلع المواصفات عجيبة :p .. بقى بلاها ;)



ولكن سأتخيل نار البحر sh:ohmy لأ ما قصدي أنه هادا أنت طبعا ..

.. أنا أعتقد أنك :

طول 180

جسم متناسق (ليس بدين )

الشعر أسود والبشرة بيضاء

لديه شارب (يعني لا يحلق شاربه)

دقيق في اختيار ملابسه ..

يعني هذا ما استطيع قوله

sh:hi

[اللاذقية]

يعني مو معقول يعني إذا كل الناس بتلبس جينز سلم ما بيخطر لي أنو يلبس جينز
معقولي .. معقولي .. سلم بيلبس جينز .. أيه إن لله في خلقه شؤون
بس شفت كيف ظبطت معي شغلت الدقن الطويلة شيخ سلم
مع كل احترامي

[shababdaim]

بسم الله الرحمن الرحيم

اخي نارالبحر انا ما بعرف من هي ماريا كيري تخيل:eek:

انا ما بحب كثير الافلام الامريكية بس اذا شفتها ما بحفظ اسماء الممثلين :D




اخي اسامة اوكي اعرفت اني طويله :cool: نعم انا طويله 167 تقربيا


اللاذقيه .....هزي الورد علي راحتك .بس بشويش بشويش sh:eye


اما المفاجاة فهيا في سلم

اولا انا امس كنت بدور علي الموضوع عشان احط تخيلي لك بس ما لقيتو

كنت بتوقع انك بتشبه محمد رياض (ممثل مصري ) بس مع لحية طويله وعلي انحف


بس انك تلبس جينز وقميص ضيق :eek: هذا ما لم يخطر ببالي

وكمان عرفنا انو دمك خفيف .هي اوول مرة بتكتب في موضوع مرح ......;)


شكرا لنار البحر لانو خلاك تضحك معنا قليلا ;)


انا رح اتخيل العراب

فيه ممثل سوري كل ما اشوفو احس انو العراب وهو نجاح سفكوني


بس علي اصغير وبيدخن علي طول :cool:



ولنا عودة :cool: ان شاء الله

[اللاذقية]

هلق العراب بيشبه نجاح سفكوني ؟؟؟؟؟
العراب بيشبه أنتونيو بنديراس
نايس كوين بتشبه مرح جبر
و tiger4u بيشبه انتوني هوبكنز

إلى اللقاء

[جارةالوادي]

:D أختي شباب دايم العراب مابيشبه نجاح سفكوني ..

ما بعرف مين بيشبه ..

;) ..

sh:hi ..

بس من شان ما حدى يشبهني رح قلكم اني بشبه أخي جاري الوادي ..

;) :D

sh:hi

sh:hi

[*TORBEDO*]

شكرا أخي نار البحر على هذا الموضوع

أما الأن سوف اكتب لكم عن انطباعي عندما دخلت المنتدى ....؟؟؟

رحت أضع المشاركات وأتصفح المنتدى عندها قرأت رداً للأخت هلوول وكانت عبارتها موجودة
( مراقبة متعسفة ) .....؟؟؟؟؟؟!!!!:cool: :cool:
استغربت الموضوع وقلت بنفسي ما الذي يجعل مراقبة تضع تحت إسمها مراقبة متعسفة sh:ohmy sh:ohmy
ورحت اتابع ردودها على الأعضاء ( ما شاء الله حاملة السيف وماشية ) :D :D
تخليتها بشخصية قوية ولا يمكن مناقشتها ومن هذه الأمور ولكن عندما اجتمعت بها تغيرت كل الصورة التي رسمتها
فهي لا تملك أي شيء من التعسف

أما الأخ GODFATHER
فكانت له صورة مغايرة تماما للصورة التي رسمتها ...؟؟؟

[نار البحر]

طيب طيب يا جماعة ما شاء الله صار زحمة بالردود

بنبدا من عند شانت
و انا يا اخي ما بقدر اتخيلك لانو كمان شفت صورتك و من دواعي سروري انو مشاركتك الرقم 500 كانت عندي و رح تبقا ذكرى حلوة

اخي تايغر فور يو

معك حق دائما الصورة بتطلع مخالفة للي رسمناه بمخيلتنا
يمكن دائما بنرسم الصورة الاجمل لانو هادا اللي بنريده يكون الشخص اللي بنعرفه
مرة اتعرفت على شخص هون بالرياض كان عم يرد على مواضيعي ايام وقت اللي كنت اكتب بمنتديات مكتوب قبل ما اعرف شبابلك
و عطيته رقم تلفوني و زارني اي صدقني اتوقعت اني بعرف شخص تاني
عمره 23 سنة و شكله بيوحي انه بالتلاتين
يعني وقت اللي قلي 23 سنة على الهاتف فكرته متل اخي اللي اصغر مني
وجهه طفولي و مبين عليه لسا شب باول طلعته
بس وقت اللي شفته


sh:ohmy


شوارب بوقف عليها النسر و جسم و عضلات و يا لطيف يا رب تستر وقت اللي سلمت عليه ايدي بايده ما بينت
يا لطيف يا رب تستر
خفت على حالي
بس بهداك الوقت عرفت ليش مسمي حاله بمكتوب ( جاكي شان )
اتاري صاحبنا بحب القتل و الضرب كتير

اخي عامر
يعني ما نقيت من كل هل المنتدى غير الادمن
الله يسامحك حتى لو ما كان بالشخصية و عم تقصد المضمون
انا بعرف الدكتور غير هيك
و يالله على كل حال انت حر بتتحمل مسؤولية كلامك

sh:eye

اخي اسامة شكرا لك
طيب ما خبرتني بتشبه جمال سليمان و لا لااء
انا هيك بتوقعك

يعني تخيالتك يا ام السوس
كتير لابقة لجورية
و اكتر شي عجبني هي شغلة الرسمي
و الله جورية بيطلعلها
دعم يا عمي دعم

sh:happy

شكرا لك اختي نايس كوين
طيب كلامك مزبوط حتى لو زكرنا الطول و الشكل و لون البشرة
بيبقا لكل شخص تيب معين
طيب اسمعي
لو فرضنا انك قلتي شعرك اشقر ولون بشرتك ابيض و عيونك خضر
اكيد ما رح نكون صورة واضحة
و لكن وقت اللي بنقول انو نايس كوين هيك و هيك و بتشبه سلمى المصري
يعني بنكون كونة فكرة بسيطة
على كل الموضوع للتسلية فقط و سبر اعماق مخيلة كل واحد بهل المنتدى الرائع
تحياتي لك

اهليين اخي سلم مرة تانية
طيب انا ذاكر مواصفاتي قبل هيك بالموضوع
لتكون عم تنقل
ممنوع الغش ترا
يا سيدي شوف تخيلك اذا مزبوط و لا لااء
صورتي موجودة بالبوم شبابلك
و على فكرة اذا انت موجود بالرياض انا موجود بالرياض
خلينا نشوفك
على الحقيقة يمكن تغير فكرتك
بس خليني الك
صدقني
انا وقت اللي قرات وصفك عن نفسك اتاكدت من شغلة كنت من زمان عم دور على اجابتها
و هي انو الهادىء بكتاباته بكون شرس بطباعه بس بكون خافيها لوقت الحاجة
اسالني الي ...بعرف حالي وقت اللزوم
يا لطيف ...
و بناء عليه
انا اتوقع انو المتعسفة هلول بشكلها بتشبه هايدي
حدا منكن بيعرف هايدي اللي كانت تطلع ببرامج الاطفال
يعني شكلها بيوحي بالهدوء و طباعها من جوا ( متعسفة )
و هيك اخي سلم
شكله فيه هدوء جميل و لكن من الداخل ( متعسف )
على فكرة انا ما بربي لا شوارب و لا لحية
مااااااااااااابيلبقولي

sh:happy
تحياتي لك

اهلا شباب دائم
يعني لا شكر على واجب شو هل الشغلة البسيطة
ولو بدنا شغلة تحرز

تحياتي لك

اختي الاذقية
و لا يهمك هي جيت على الموضوع و رديت
بلاها القتلة بقا خلص سماح هل المرة



sh:hi

[نار البحر]

جارة الوادي

هههههههههههههههههههههه حلوة هي جاري الوادي

عرفينا عليه وينه

شكرا لك اخي توربيدو

شوف ردي على موضوع هلول كيف مشبهها انا يا ترى صح و لا غلط


بس انت ما خبرتنا عنك كيف

يالله سلام


sh:hi

[*TORBEDO*]

هههههههههههه
شو هايدي ما هايدي
انا بنصح انوا تغيرها لانوا مو مستعد انوا اكفل هلوول وخصوصا ازا تعسفت


أما بالنسبة لموضوع التكلم عن شخصيتي فسوف أترك هذا لكم ..sh:eye
وأرجوني شطارتكن sh:eye

[نار البحر]

فعلا الموضوع رائع انس و هو للاخ حشيشة

و تاريخه قبل ما سجل انا بشهر

بس الغريب كيف اللي شاركوا فيه متل سويت ناني ما اتذكرته

اخي توربيدو

خوفتني sh:ohmy ليش لازم غير راي بخصوص هلول

يعني شو مثلا بتشبه

sh:ohmy

[nice_queen]

اي معك حق اخ نار البحر انو التشبيه ممكن
وبكون التشبيه ...قريب نوعا ما
بس مافهم
شو بالنسبه لسلمى المصرى
يعنى انا بشبهها ولا مثال
:D
قال سلمى المصرى قال
ماالك علاقه
اللاذقيه
ليكى هلأ زوجى قاعد معى وفقع من الضحك
قال ماتكون مؤامره مشان يدخل ويقلك لأ
بتقوموا بتعرفوا مين هو
قال بس شو ماعملتو مارح يقول
ليش يعنى تخيلتى مثل مرح جبر
لا مابشابهها

اللاذقيه بتخيلك لاذقانيه(يعنى تيب لاذقانى )
يعنى مثل مذيعه بالجزيره بس مابعرف شو اسمها


ههههههههههههههه
انا حزروا لالكم
ومشان ساعدكم انا بشبه ممثله سوريه مثلت باعمال تاريخيه
وين مابروح بقلولى بتشابه
هو التيب ما بشبهها بالظبط

اي كملو وانا بعدين بشوف كيف بدى اتخيلكم


صحى نار البحر عجبوك سنافر بنتىولا لأ

باي
نايس كوين:D :D :D

[SLM]

السلام عليكم ورحمة الله وبركاته

عزيزتي اللاذقية ..أختي الغالية شباب دايم

إي ظبطت مع اللاذقية الدقن الطويلة ..
شكرا لكلامك اللطيف أختي شبابدايم .. وأنا رجل مرح جدا ولكن عند الجد جد .. لذلك تجدي أصدقائي اللي كانو معي بالثانوية .. لسعتن معي لليوم , وسافروا لعندي عالرياض .. ولليوم نفس الأصدقاء .. ولله الحمد ..

بس يا جماعة .. أنتو عمتتسائلو ليش SLM بيلبس جينز في أوقاته الخاصة .. يعني ليش مو ثوب أو رسمي على الأقل .. فأقول هناك سببين خلوني حافظ على هذا اللبس .. بعد ما التزمت وتعلقت بالجهاد وهما :

1- لأخالف المفهوم الخاطئ الذي راج بين الناس , على أن الإسلام له ملابس موحدة ..

وفي الواقع .. أن المسلم له الحق بأن يلبس ما يحب من الملابس الأنيقة والجميلة التي لا تخالف الشرع , وأن يحدث بنعمة الله , ومن ذلك أن عمامة الإمام المالكي (مالك بن أنس ) كانت تقدر بخمسمائة دينار ..
قال تعالى (قل من حرّم زينة الله التي أنزل على عباده والطيبات من الرزق .. قل هي للذين آمنوا خالصة يوم القيامة ) وقال تعالى (وأما بنعمة ربك فحدث)

2- أني أرى بأن الجينز والبنطال العسكري وملابس الرياضة تعتبر من ملابس (الدعك) والخشونة ,وهذا أقرب إلى ملابس المجاهدين من الثوب ..لذلك أحبذها كثيرا ..

يعني أنا زلمة أحاول أن أحب وأفعل كل شيء له علاقة بالجهاد.. لعل الله أن يكتب لي يومارفقتهم ..

*** **
أما أنت يا أخي نار البحر
كيف حالك .. أنا ما انتبهت انك كاتب وصفك .. يا الله ماشي الحال
.. قريب شوي من تخيلي ..

بس عزيزي أنا لا أرى نفسي متعسف .. أنا قد أكون شديد شوي .. ولكن إذا تعلق الأمر بالله ودينه .. فممكن أنحمق ..
أما أذا انحمقت بالمحادثات والنقاشات .. فهذا لأني أعشق الحوار ..
ولكني لا أخرج أبدا عن طوري بعون الله ولله الحمد ..
وهذا ما أحرص عليه .. لأني لا أحب أن أخسر الأصدقاء .. بسب كلام غير مدروس


وإلى تخيلات قادمة .. نراكم بخير
تحياتي لكم جميعا
أخوكمSLM sh:hi

[SLM]

أنت بتشبهي ( فطوم حيص بيص) :D

سلامي :mad:

[nice_queen]

لك شــــــــــــــــــــــــــــــــــو
ماسمعت
قصدى ماقرأت
لك عن جد انت ذكى كثير
ههههههههههههههه:D
هلأ هيك طلع معك


شايف استاذ نار البحر
كيف عم تفوتنا بمتاهات
والله لما قريت شو كتب سلم
فتت بالحيط

طيب ياسلم انت بتشبه ابو كلبشه
منيح هيك

:D :D :D :D


راجعتلك على رواء ياسلم

مع تحيات
نايس كوين

[SLM]

أهلا عزيزي AN@S
فعلا .. أنا اتفاجأت أيضا .. يعني توقعت ان البعض متخيلني بالثوب الأبيض القصير والقبعة البيضاء واللحية الطويلة .. وأنا بكون هيك كثير من الأحيان .. يعني أذا كنت ذاهب للصلاة .. أو الدروس العلمية فبلبس الثوب والقبعة وأحيانا بلبس هيك بمشاوير عامة .. السوق بيوت أقاربي اللي هون . إي بس مو لهالدرجة sh:ohmy ..

ولكن أنا فعلا من طول عمري ما برتاح إلا باللبس الخشن .. والبوط الكبير والتيشرتات والجينز أو البنطلون المموه .. وما زلت محافظ على هذه المفضلة .. وحبيت هالملابس أكثر بعد التزامي ..


أهلا أختي Nice queen

إختي طولي بالك .. لا تفتحي علينا الرشاش .. صحيح زوجك اكتشف حقيقتك

بس ..
يعني لازم قلبك يكون متسع .. وراضي بقدر الله .. :cool:

والحقيقة ما بتزعل :rolleyes:

sh:hi

[Sweet_Nany]

والله انكن شريرين..

هيك يا نايس كوين طلعتي بتشبهي فطوم حيص بيص؟؟

كل ببالي على حسب ما ذكرتي نورمان اسعد..

وبالنسبة لهلموضوع اخي نارووو

بالفعل كان الموضوع بزمناتو لاخي الغالي جدا حشيشة..

صحي ما عاد سأل عنا بس بيضل غالي على قلبي كتير..

وانا شاركت بهالموضوع وبظن عمو اسومة بيتذكرو..


وبعدين وين ما حدا اتخيلني؟؟؟!!!! :(

[Haloul]

ههههههه

على مهلكم عليي...

ناس متخيلني شبه متل هايدي... و ناس عم تحاول توحي اني متل السفاح (بسيطة توربيدو)..

و الله لولا ان الآنترنت مكان عام لكنت نشرت صورتي في المنتدى.. بس يالله في كتير اعضاء بيعرفوني... و ان شاء الله تتاح لي الفرصة لكي اتعرف على الباقي...

يعني جمال هايدي متعسفة ما بتضبط;) :rolleyes: هههههههه.

[سامي أنيس]

له له له يييييييي على قلبي

لك هيك بتنسوا ام السوووس

ياستي انا رح اتخيلك

بتصور انك نحيفة

طولك شي 160 - 165

شعرك أسود طويل

بشرتك حنطية

العيون سود

ومو بعيدة يكون في شبه بينك وبين صاحبة الصورة

لنشوف قديش صح كلامي

[mahmud-d]

شكرا ل نار البحر على هذا الموضوع
وهذه أول مرة أشاهد الموضوع وأعجبني كثيرا
طبعا أنا تعرفت على بعض الأعضاء في معرض شام 2003
مثل أسامة وأنس و تايغر فور يو وأمير عربي وقاسم وبيشو

بالمناسبة خطرت لي الفكرة من أول ما اشتركت بالمنتدى وكل مابدي أتخيل عضو افتح على هويته بالمنتدى أي عمره ثقافته وووو ثم أكون عنه صورة وقد زبطت معي عندما تعرفت على الشباب بالمعرض فعرفت أنس و أسامة ووو

ما بدي كتر حكي كتير أنا بتخيل سويت ناني:

طويلة بيضاء البشرة مهضومة نحيفة بس قوية
وشامية أصلية بتحب اليبرق والمحاشي (ما بعرف إذا بتعرف تطبخهم)

مزبوط مو هيك سويت :D :D

ممكن حدا يتخيلني شباب

محمودsh:hi sh:hi

[osama_brd]

طيب ولا تزعلي عمو سويت ولا تنكي دخيلك حاكم إذا بكيتي ما عاد تسكتي :D ..

سويت ناني :
الطول 165 سم
الوزن 65 كلغ
الشعر أسود وتضع شريطة هون وشريطة هون ( متل صف الأول الابتدائي يعني ) :D ..
حكيها شامي معتق ( يعني سمعتها بالإذاعة أكتر من مرة ) ..
شريرة وهذا اهم شي sh:ohmy


أسامةsh:hi

[Sweet_Nany]

الأغلب غلط

بس رح نقي الشغلات الصح..


سامي أنيس :

بشرتك حنطية (( بس مايلة للسمار ))

طولك شي 160 - 165 ... (( 160 على الحل ))

والباقي غلط

mahmud-d :

مهضومة .. قوية (( وهالشي شايفينو بالمنتدى ))

وشامية أصلية بتحب اليبرق والمحاشي (ما بعرف إذا بتعرف تطبخهم)
(( ايه بعرف ))

osama_brd :

الوزن 65 كلغ (( مو بالزبط بس مالي نحيفة انا :o ))
تضع شريطة هون وشريطة هون ( متل صف الأول الابتدائي يعني ) ..
حكيها شامي معتق ( يعني سمعتها بالإذاعة أكتر من مرة ) .. (( صحيح ))

شريرة

وهاد الصح :rolleyes: :rolleyes: :rolleyes:

[nice_queen]

ياســـــلم
هلأ انا فطوم حيص بيص!!!!!!!
وطلعت حالك شغله ؟؟؟قال جينز وتشبيح :D
اتذكرت
والله بحطى بدينى شكلك مثل ياسينو
اي سويت نانى
لك تسلميلى بس بتعرفى بظن انت مثل تيب اثار الحكيم
يمكن....هيك متخيلتك... وناعمه كثير ....وشيك

وانا لا مابشابه نورمان اسعد ابدا

وانشاء الله بشوفك بالشام
تحياتى للجميع

يتبع
باي
نايس كوين

[shababdaim]

يعني العراب ما بيشبه الممثل نجاح سفكوني :( انا من يوم ما عرفتو انا بتخيلو هيك :(

يلا طيب خلوني اتخيل انس :cool: عن جد انا بتخيل انس هيك

طويل .نحيف ولكن بجسم رياضي ..هادي ..خجول ....في عينه نظرة عميقه تحس انه شارد الدهن حتي وهو يتحدث معك ......له ابتسامه تنم عن الطيبه :cool:

شو كمان ........ملامح دقيقه ووسيم :cool:

يلا انس شوفلنا هالوصفات بينطبقو عليك او لا



ورح ارجع طبعا


سلام


شباب دائم :cool:

[shababdaim]

جارة الوادي ..كيف شكل جار الوادي لو سمحتي :D ممكن توصفيه :D



سلام

[اللاذقية]

سلام
يعني ظلمتو سلم يعني هوي صحيح بيلبس جينز بس جلابية
ولا يهمك أخي الطيب slm أنا معك
وراء كل سلم عظيم لاذقية تدفشه إلى الأمام

****

[جارةالوادي]

:D نار البحر وشباب دايم سألتما عن جار الوادي ..مين بيشبه ..؟؟؟:D

طيب يضع نظارات ..

وبيشبه شارلوك هولمز ..

بس عليه لسان ساخر بس لواقع مؤلم ..وحقيقي ..

وعلى طول بتلاقي بيده مكبر .. يرى من خلاله ماوراء الأشياء الغير منظورة ..

وبيده الثانية قلم وورقة بيكتب عليها ما يرى بلهجة ساخرة ..

انا مابعرفو بس هيك بيخطر لي .. شكله ..

sh:hi

:D

[SLM]

أنا بشبه ياسينوو

إي بس لولا أني خايف أفتن نساء المنتدى.. وما عد يعجبهن شي .. كنت حطيت صورتي وفرجيتك شلون .. :D
بس يا الله هالمرة سماح .. وما رح أعملها :rolleyes:
بس هلق بتشوفي .. ;)
* * *

أهلا باللاذقية .. تسلمي تسلمي والله ..
لك أكثر شباب سوريا بيلبسو جينز .. بقى ليش الحبايب استكتروا عليي هالبنطلونsh:angry

[*TORBEDO*]

طيب انا رح أتخيل بعض الأخوة بالمنتدى ابدأ
جارة الوادي :

صبية محترمة وواعية عدا عن هيك مترددة ببعض الأحيان
الطول : شي 170 سم
الوزن : بتصور فوق 65
حنطية البشرة
وبتموت بالياسمين

batman :

يملك روح الدعابة ولكنه لا يظهرها
الطول : حوالي 165 سم
الوزن شي 70
بشرته سمراء
يحب التكتم

shababdaim :

عدا عن أنها كبيرتنا الا انها منضبطة وتعرف ما عليها القيام به وتتميز بأخلاق نبيلة وشخصية قوية
الطول : 175 سم وربما اكثر
الوزن : بتصور فوق 75
بشرتها سمراء اللون
تمتاز بحس مرهف وعواطف قوية


ولا تواخذونا :D :D

[جارةالوادي]

:D صدقت أخي توربيدوووووووو..:D

أني فعلا أموت بالياسمين ...;) :D ..

ومحترمة كمان والحمد لله ...وواعية والحمد لله ..

وغيرو اسمح لي قلك ..

ما بيشبهني ..

:D

;)

ههههههههههه..

:D

[shababdaim]

بسم الله الرحمن الرحيم

اخي انس

والله ما حدا وصفك ليا بس انا دائما بتخيلك هيك ....انت دائم التفكير وهذا واضح من خلال موضيعك ومشاركاتك وكمان الافاتر يللي بتحطها ...بس اعرفت انك خجول من احد الاعضاء كنا بنتكلم عالماسنجر ;)


اخي تربيدو بالنسبه لطولي فطولي 168 بس وزني 80 كيلو :eek: انا بروح الجم عشان اخفف شويه :D .بس الطول واخد الوزن يعني مو بين اني سمينه :D


وبعدين شو كبيرتنا هي :mad: يعني انا صحيح 38 سنه بس والله ما بين علي ابدا عن جد ما في حدا يصدق اني 38 ابدا :cool:


انا مش سمراء ابدا ..هي عرفتو اشياء عني

بس شكرا كثير علي كلامك الحلو عني تسلم والله


بس لسه الشكل ....وفيه وحده بتعرفوها كلكم بيقولو اني نسجه منها بس مش حقولها خلوها بعد عدة محاولات من بقية الاعضاء



جارة الوادي

يعني انت عن جد بتشبهي جار الوادي :eek: لا مو معقول ابدا نو واي



بس بضل مفاجاة الموضوع اخونا سلم .الله يخليك فيه صبايا متزوجه وفيه بنات علي وش زواج ..فلا تحط صورتك ارجوك .......وكمان عشان خاطر المدام يعني حرام :D

يلا تقبلو تحياتي واحترامي لكم جميعا


اختكم المحبه

شباب دائم

[GODFATHER]

شو مشان ... نجاح سكسفوني ؟؟؟ هذا
:D :D :D :D

اخت شباب دائم .. يعني تخيلك لي .. ما بعرف ..

فيه شئ صح وفيه شئ غلط ؟؟؟ :cool: :cool:

.
.
يرجى المحاولة مرة اخرى

sh:hi

[Ghiath]

السلام عليكم :

ما صرلي زمان بشبابلك بس رسمت صور مبدئة عن بعض شخصيات المنتدى :


سويت ناني :

بيضاء - متوسطة الطول - شعرها خرنوبي فاتح وتحب صبغه بالأشقر وقد يكون متوسط الطول غلى طويل - أنفها ناعم ودقيق شفتاها رقيقتان - سيدة منزل من الطراز الرفيع - صديقة لأولادها - صافية ونقية - يستشيط غضبها بسرعة - رومانسية - عيناها عسلي فاتح ، ربما يكون لها غمزة بخدها
زوجها : أميل إلى السمرة - طويل القامة - عملي

نايس كوين :

حنطية - شعرها قصير أو متوسط الطول أميل إلى السمرة - لديها القدرة على السيطرة على أفعالها ومشاعرها ، يعتمد زوجها كثيراً عليها ويثق بها وبرأيها ، متماسكة وواثقة ، عيناها غامقتا اللون ، ولا أدري لماذا أتخيها دائما بحجاب انيق مع أبتسامة هادئة تقول ( سعيدة بلقائك ولكن لن تملكني )

اللاذقية :

فتاة في مقتبل العمر لها ميول غربية - شقراء - ناعمة


أسامة :
كنت متخيلوا ببنطلون جينز وبنظرة متل ما توقع معظم الشباب ، ولكن ظني ما طلع بمحلوا لما وصف نفسوا .

SLM
رجل بمعنى الكلمة

أما أخي نار البحر فقد كان مشابهاً جداً لما تخيلته ( أمبارح كنا سوا - يا عمي كنت شايف حالي بعيوني الخضر - لك طلعوا عيونو خضر بيجننوا )

[SLM]

أختي الغالية شباب دايم
ماشي أقنعتيني ... :rolleyes:

الشخصية المفضلة لدي . . العراب
أنا سبق أن تخيلتك في موضوع (مدينة الأشباح )
وماني متذكر شو كان تخيلي .. رح جيبو من هنيك ..


عزيزي .. ghith

يا أخي أخجلتني .. هذا من لطفك

الواقع أن هذا الزمان والمكان لا يخرجان الرجال ..
فسأستكثر على نفسي هذا الوصف ..
أنا وأمثالي في الحقيقة .. هم مأساة هذا الزمان .. نعيش كالدواب .. على الأكل والشرب والمتعة .. وإخواننا يقتلون ويموتون .. فأنّا لنا الرجولة ..
نعيب زماننا والعيب فينا .. وما لزماننا عيب سوانا
الرجولة هناك .. تحت أمطار النار .. ووميض السيوف .. وسيول الدماء .. وأشلاء القتلى ..

فإذا لقيتني يوما في مثل ذاك الزمان والمكان .. فاكتب على ظهري ..

.. محاولة رجل

[SLM]

هذا وصفي لك من تاريخ 17-9-2002 في موضوع ((المنتدى . مدينة الأوهام و الأشباح ))



أنت يا عراب برأيي , بالك , وقلبك كبير لدرجة جيدة , وطموحاتك من النوع المتوسط , يعني لا تحاول أن تكون صائب النحاس , ربمى تحب أن تكون مرتاحا في حياتك ماليا وذهنيا . فلا تريد أن تسعى بشدة وراء المال فيعكر عليك صفو ذهنك , و الإسلام مؤثر في فكرك ولكنه لا يظهر على شكلك .

وهذا جوابك :

الاخ SLM : تحليلك النفسي...... بدون تعليق !!!!
*********

ولا أنكر بأني أعتبرك من الشخصيات الغامضة .. لذلك لم أكن لأتيقن من وصفك النفسي ..يعني اليوم أنا غير مستعد لتخيلك ..


sh:hi

[GODFATHER]

اخي SLM شكرا لوصفك لي..

وانا كتبت بدون تعليق .. لاني ردي على التعليق كنت سأرسله برسالة خاصة لك

ولكنك لم تبتعد كثيرا .. وفي احدى النقاط اقترب جدا مني

على كل حال .. ما اعتقد انه حدا فيه يعطي وصف لي الا اللي شافوني وخصوصا بعد شغلة هي نجاح سكفوني مدري سفكوني تبع الاخت شباب دائم

:D

[shababdaim]

خسارة اخ يالعراب

والله من يوم ما دخلت للمنتدي وجدبتني مشاركاتك وانا بتخيلك نجاح سفكوني

:( ضيعت الصورة مني ياريت ما قلتها ...علي فكره انا بيعجبني كثير شخصيه

هذا الممثل ...ووبتعجبني الرجوله الخشنه :D ما بحب الرجال يللي بنعمو

حالهم كثير ...طبعا الناس اذواق وهذا مجرد رأي .........وبعدين انا ست

متزوجه :D


:D

طيب شو رأئك في اسعد فضة :D ...بس علي اصغر اكيد :cool:


اخونا سلم ...الباين اني صبتك بعين :eek: :D sh:ohmy sh:ohmy


يلا سلام الي وصف اخر


تحياتي

شباب دائم

[جورية]

بسم الله الرحمن الرحيم
اصدقائي الغالييييين
السلام عليكم و رحمة الله و بركاته



لك ييييييييييييي انتو هون؟
و ما حدا بقلي؟؟؟؟؟؟؟؟؟؟
لك بتحكوا علي و انا ما حدا لحدا؟
عم قول طنوا ادنيييييي
لك سلم؟؟؟؟؟؟؟؟
وين مرتك اه؟؟؟؟؟؟؟؟؟
قاعد عم توصف بحالك و الله كانوا بدك تطقها جوازة؟:D
و جينز و ما جينز يا عمي مين قدك
لك مو ناقص الا تبعت رقم الموبايل و الفاكس و رقم البيت
لك ششششششششوبك شو ما في مرة وراك و لا شو؟:mad:
و بعدين طول عمري بعرفك نكدي و معصب و بجد
بشوفك انو انته ما بتضحك للرغيف السخن
و دائما معقد و بتتنتور بالرايح و الجايي
و صوتك دائما بيلعلع على هل المرة المسكينةيا حسرتي عليها
و اولادك وقت بيشوفوك بيهربوا من رعبتهم
و اصغرهم بيعملها باواعيه:eek:
هيك بتخيلك انا


و ام السسوسسسسسسسسس
بتخيلها قطقوطة مغنوجة ام الرواء
عليها صوت بدبح دبح من كتر رقته
و حبابة و رايقة و ست الكل بالاناقة
بسسسسسسسسسسسسسسسسسسسسسسسسسسسسس
لجوزها بظن انو رح يكون ضحية بايديها
يعني ما بتسكتله على وحدة و رح تفطسه
بس قلبها طيب و طيوبة


اسسسسسسسسسسسسسسسسسسسسامة
بحسه مو كتير حلو و هيك في حول بعيونه
و بحسه دمه تقيل و حكياتها ما بينزلوا على معدة
و صوته وقت يفيق من النوم كانه قطار بخاري عم يصفر
ههههههههههههههه اسالوني انا وقت كنت اسمعه بالاذاعة
و بحسه هيك مربوع و دائما لابس بناطرين غامقة و بلدي
و وقت بتمرء من جنبه بنت بيقول استغفر الله
و قلبه عم يقول حء بء هههههههههههه


جارة الوادي الغالية
بحسها امورة و قلبها عسسسسسسسسسسسسل
و رايقة بس جدية كتير
ما بتعطي وش الا للناس يلي بتثق فيهم
و خدومة لدرجة التضحية
بس وقت تعصب وليييييييييييييييييييييي
بيحمروا ادنيها و بتصير تولولولوللولولولولول
و بتخلي يلي جنبها يتمنى الارض تنشق لتبلعوا


انوسسسسسسسسسسسسسسسسسسسسس
رايق و رياضي و اكول
بحسه بيحب بطنه و فجعان
بتلاقوه البوشار و الكولا ما بيخلصوا من البيت
و بحسه لابس نظارت سمكها سمك نظارت ستي
لانه طول اليوم من تلفزيون لفيديو للسينما
بحسه بيحب الليل و تحت عيونه اسود من السهر
و بحسه بيسهر بالليل لانه بيخاف ينام لانه بيخاف من الوحش
لك عقدنااااااااااااااااااا بقصصه لهيك بيسهر


شباب دائم
بحسها حبابة و حلوة و امورة و قلبها ابيض
و مظلومة بحياتها بسسسسسسسسسسسس قوية
بتاخد حقها بايدها و لو بعد حين
و ام فاضلة و زوجة طائعة بسسسسسسسسس
اذا زوجها تنفس قدامها بحسه راح فيها
لانه رح يندم انه قال لاء
بحسها حاملة الشحاطة و راكدة ورا الاولاد ههههههههه
و صوتها موصل لعنا من كتر عياطها عليهم
و بحسها قاعدة بالمطبخ وولد تحت رجليها و التاني
عم ينط على راسها و التالت عم يبكي بالارض وليييييييييي


ولي تعبت بكرا بكمل بس انته جمال رح روء عليك
و اوصفك وصف غير شكل
استنى عليي...........(يا جماعة الحقيقة ما بتزعل هه)
و الله الموفق:D

[نار البحر]

هلا بجورية الغالية
نورتي الموضوع ...

بس الله يستر عليكي استري علي

مو ناقصني فضايح

:(

sh:happy

sh:ohmy

sh:hi

[osama_brd]

شو هالوصف جورية خانم :mad: ...

طيب شوفوا يا جماعة أنا شو بتخيل جورية ...

وزنها شي 120 كلغ .
طولها شي 115 سم
لون الشعر أبيض ( هنن كم شعرة براسها ) .
لون العيون أزرق
لون البشرة أسود غامق ( بني محروق ) :D ..
الأسنان نصهم ذهب والنص التاني مقلوع ..

:D :D :D


أسامةsh:hi

[جارةالوادي]

جورية الغالية ..

وصلتي الى الكثير مما انا عليه..

ربي يسعدك ..

واسالو الورد الجوري .. بيخبركم عن الياسمين ..

تحياتي لك ..

;) ..

[زهرة سوريا]

هااااااااااااااااااي
شو هالموضوع الحلو هاد والله ما بيخطر بالبال
بسسسسسسسسسسسسسسسسسسسسسسس ليش الموضوع مقتصر على جوريه واسامه الخ يعني واله انا موجوده وفي كمان كتيييييييير ناس بالمنتدى مانذكر اسمائهم
بس عن جد الموضوع حلو كتير
سلالالالالالالالالالالالالالام

[Sweet_Nany]

اخي الكريم غيث..

بيضاء - متوسطة الطول - شعرها خرنوبي فاتح وتحب صبغه بالأشقر وقد يكون متوسط الطول غلى طويل - أنفها ناعم ودقيق شفتاها رقيقتان - سيدة منزل من الطراز الرفيع - صديقة لأولادها - صافية ونقية - يستشيط غضبها بسرعة - رومانسية - عيناها عسلي فاتح ، ربما يكون لها غمزة بخدها
زوجها : أميل إلى السمرة - طويل القامة - عملي

:eek: :eek: :eek:


============================
انا رح أحذف الشغلات الغلط
============================
متوسطة الطول - شعرها خرنوبي فاتح ((ما بحط صبغة منوب والله )) وقد يكون متوسط الطول غلى طويل - سيدة منزل من الطراز الرفيع (( على العكس تماما)) - صديقة لأولادها(( ازا اجو انشالله )) - صافية ونقية - يستشيط غضبها بسرعة - رومانسية - عيناها عسلي فاتح ، ربما يكون لها غمزة بخدها(( هي كييييييييييف عرفتها؟؟؟؟؟؟؟؟؟؟؟؟؟))
زوجها : أميل إلى السمرة - طويل القامة - عملي (( ما اتجوزت لسه )) :rolleyes:
__________________________

بالنسبة لأنوســA@NSـــة

والله يا اخي الغالي مالي متزكرة بشو وصفتني..

ذاكرتي عدم الله يحسن خاتمتنا على خير :o

__________________________

نجي لعند جورية حبيبة قلبي

انتي قلتي


و ام السسوسسسسسسسسس
بتخيلها قطقوطة مغنوجة ام الرواء
عليها صوت بدبح دبح من كتر رقته
و حبابة و رايقة و ست الكل بالاناقة
بسسسسسسسسسسسسسسسسسسسسسسسسسسسسس
لجوزها بظن انو رح يكون ضحية بايديها
يعني ما بتسكتله على وحدة و رح تفطسه
بس قلبها طيب و طيوبة
==============================
ورح امحي الشغلات الغلط
==============================

و ام السسوسسسسسسسسس
بتخيلهامغنوجة ام الرواء
عليها صوت بدبح دبح من كتر رقته (( :o شكرا حبيبتي ))
و حبابة و رايقة و ست الكل بالاناقة (( يسلموووووووو))
بسسسسسسسسسسسسسسسسسسسسسسسسسسسسس
لجوزها بظن انو رح يكون ضحية بايديها (( صح 100 % ))
يعني ما بتسكتله على وحدة و رح تفطسه
بس قلبها طيب و طيوبة (( والمصيبة الكبرى انو يكون القلب طيب ))

كلمة الى نار البحر...........

بيجنننننننن الموووووضوووووع

عمـ.. عفوا .. اخي العراب...

بصراحة انا بشوفك بعباس النوري مو نجاح سفكوني..

وجارة الوادي..

مدري ليش بحسها جوليا روبرتس ..

شباب دايم..

يعني ممكن نقول ستايل سلمى المصري ..

عمو أسامة بعد ما غيرت رأي..

مدري ليش بتزكر ديبو رفيقو لبهلول وقت بشوف اسمك هههههههههههههههه :D :D

[osama_brd]

طيييييييييب أنا بورجيكي يا سويت ناني :mad: ...

أنا بتعرفي شو بتخيلك ...
أنا بتخيلك بتشبهي الساحرات تبع أفلام كرتون ( الرسوم المتحركة ) :p ...
يعني راكبة على مكنسة وعم تطير فيها وشعرها طويل أبيض وحاطة على راسها طاقية وأنيابها مبينة sh:ohmy sh:ohmy . ولي خفت ... وماسكة بإيدها عصاية سحرية ... بس ما تمسخني ضفدع :D :D ...


أسامةsh:hi

[shababdaim]

شو اخي العراب ما عجبك اسعد فضة :D

طيب نقول دريد لحام ..شو رأيك :cool:


انووووووس .انا رح خلي هلووول ترد عليك ....:rolleyes:


قمر المنتدي سويت ناني :cool: بصراحه قربتي كثير ...بس مش في الشكل في

الكسم (القد يعني ) انا بشبه سلمي المصري في الطول والعرض ..بس مو في


الوجه ابدا :cool:



نجي لجوريه شوفو شو قالت عني

_____________

شباب دائم
بحسها حبابة و حلوة و امورة و قلبها ابيض
و مظلومة بحياتها بسسسسسسسسسسسس قوية
بتاخد حقها بايدها و لو بعد حين
و ام فاضلة و زوجة طائعة بسسسسسسسسس
اذا زوجها تنفس قدامها بحسه راح فيها
لانه رح يندم انه قال لاء
بحسها حاملة الشحاطة و راكدة ورا الاولاد ههههههههه
و صوتها موصل لعنا من كتر عياطها عليهم
و بحسها قاعدة بالمطبخ وولد تحت رجليها و التاني
عم ينط على راسها و التالت عم يبكي بالارض وليييييييييي

____________

شو هاذ جوريه ...من وين جبتي هل الفراسه :cool:


بنسبه لزوجي ..مسكين مسلم الرأيه من زمان :cool: ....دائما بقولي كل شي


فيك حلو .....ما عدا لسانك :D

وبعدين شو شحاطه ما شحاطه .....انا ما بستعملها لا لقتل الصراصير ..ان

وجدو .....

وبعدين شو مفكرتيني أرنب .....والله هم كل يللي عندي 3 اولاد بين الواحد


والتاني 4 سنوات :cool: .......يعني انت كأنك بتوصفي أمي :cool: من شي


25 سنة



يلا .....يللي بعدو


سلام

[نار البحر]

يلي اللي بعدو

جيت انا شباب دائم

طلعت انا :D

حبيت اول شي لسويت ناني

شكرا لك و لرايك بالموضوع و اعتبريه على حسابك

جورية :

متل ما اتفقنا لا تفضحينا sh:happy

شباب دائم

عجبتني هي فكرة امك قبل خمسة و عشرين سنة
الله يخليلك ياها
انا بعرف واحد في بلدنا عنده خمسة و عشرين ولد




نيااااااااااااااااااله


صحيح ليش يعني الموضوع مركز على بعض الاعضاء

في كتير غيرهم
في عندكم مثلا زهرة سوريا عم تقول ليش ما حدا عم يتوقع كيف شكلها
طيب انا رح اتوقع

يعني باختصار بتشبه شخصية من برامج الاطفال

سندبيل


و بكفي



sh:happy

شو زهرة سوريا طلعتي بتشبهيها و لا لااء

مو و لا مو موووووووووووووو على قولة سويت ناني


تشااااااااااااااااااااااو بالصيني

[Sweet_Nany]

ميرسي ناروووو :o وبعدين الموضوع مو عن قصد انو احتكرنا بعض الشخصيات..

بس في اعضاء بالمنتدى ما وضحتلي صورتهن كتير..

ومؤخرا..

وضحتلي صورة mahmud-d :

وهو كالتالي..

لبسو كتير مرسّم وكلاسيك..
بيلبس كزلك..
ابيض وشعرو اسود
الو دقن خفيفة
طولو ووزنو متناسقين بس مايل للنحف..

وزهرة سوريا..

نوعا ما وضحتلي صورتها..

بس الغالب محجبة بحجاب ابيض وبتلبس مانطو كحلي..
نحيفة وطويلة ..
حلوة وناعمة كتير..
خدودها حمر..
ومحترمة جدا جدا جدا..
ما بتحب المزح الزايد عن حده..
وبتحط حدود كتير بينها وبين اللي عم تحكي معو..
يعني ثقتها ما بتعطيها لأي حدا..

هلء SoooS

بنت طقطوقة .. حركة كتير.. شقيّة..
قطة بمعنى الكلمة ..
حجمها زغير..
سمرا عيونها شهل..
يعني الها طابع لادقاني..
حلوة كتير كتير كتير..
أمورة..

وكل ما وضحتلي صورة حدا رح احكي ومارح خلي شي بقلبي ولو..

بالنسبة الك ناروو من بعد ما شفتك بالألبوم انمحت الصورة اللي كنت راسمتها تماما من مخي.. :rolleyes:

تحياتي ومجقاتي للصبايا :D

[wasim]

sh:questio ...








:( ...









sh:ohmy sh:ohmy sh:ohmy

[Sweet_Nany]

وسيمووووووووووووووو

يبلاني بحمى نسيتك..

وسيمو مالك طويل ونحيف كتير وبتلبس كزلك كمان
ستايلك قريب على يوري مرقدي..
شواربك خطو من جديد
قطقوط كتير وبتجنن..
عيونك زرق..
شعرك بني فاتح مايل للدهبي..

وما يبلى وسيمووو ;) :D sh:eye

[جرح السماء]

يا ترى كيف بتتصوروني يلي بيعرفني هون و ما شافني ؟؟:p :D

أما أنا فعندي تصورات كتيرة للأكثرية و سأذكرها فيما بعد و من تعرفت عليه شخصيا سأذكر كيف كنت أتخيله قبل أن أعرفه sh:ohmy :p :D :p


sh:hi

[Sweet_Nany]

جرح السماء ..

هي توقعي انا

http://www.shabablek.com/vb/avatar.php?userid=3099&dateline=1035617516

تقبشيني شو كربوجة ومعبسة
:D :D :D

[SooS]

lo0o0o0o0ol
هلأ هيك طلعت أنا أم السوس نمبر 1 ؟؟:D
معناتها لتنصدمي كتير لما تشوفيني لأنو مافي شي صح :p
عالعموم اللي بدو يعرف شكلي يشوف أفاتر جرح السماء لأنو نسخة طبق الأصل عن شكلي وأنا صغيرة خاصة التكشيرة وقلبة التم .. نفسها .. حتى إني كنت ناوية إتمشكل مع جرح السماء لما شفتوا حاطط الأفتار لأني كنت بدي حطوا ,, بس قلت لحالي مشيها .. :rolleyes: (( عاقلة كتير ))

[Haloul]

لحظة يا جماعة

أنا ما وصفت شباب دائم لأنس وأصلاً إيميل شباب دائم مو عندي وما بعرفه ..

والله يرحم أيام المسنجر

[mahmud-d]

سويت ناني
يعني تخيلك شوي زابط بس أنا ما بحط كزلك وليس لي ذقن

أنا رح اتخيل هلول
سمينة شوي وقصيرة
ملامح وجهها أقرب إلى الجدية والغضب

جرح السماء:

طويلة كتير ونحيفة
بيضاء
وجهها ملائكي
تضع نظارات.

لاتزعلوا إذا ما زبطت معي sh:hi

[نار البحر]

مرحبا اخي محمود

اي ما زبطت معك بنوب ابدا :D

لانو جرح السماء شب مو بنت

تحياتي لك و تشاااااااااو بالالماني

sh:hi

[shababdaim]

نار البحر ........شو حكايتك مع اللغات :eek:


:D :D :D :D :D


تشاو ........بالجنوب افريقي sh:hi sh:ohmy sh:eye

[wasim]

كاتب الرسالة الأصلية : Sweet_Nany
وسيمووووووووووووووو

يبلاني بحمى نسيتك..

وسيمو مالك طويل ونحيف كتير وبتلبس كزلك كمان
ستايلك قريب على يوري مرقدي..
شواربك خطو من جديد
قطقوط كتير وبتجنن..
عيونك زرق..
شعرك بني فاتح مايل للدهبي..

وما يبلى وسيمووو ;) :D sh:eye



مين بعتلك صورتي ؟
sh:ohmy sh:ohmy sh:ohmy

[Sweet_Nany]

sh:questio sh:questio



والله تخمين
منيح ياللي زبطت معي :D


بما انك جبت سيرة الاقتباس وسيمو.. كيف بتزبط معك؟؟!!! sh:ohmy

[ingeneur]

أخي جمال..
الموضوع كتيييييييييير حلو وبيجنّن... ;)

وسيييييييييييم...
أنا كنت عم اتخّيلك بمواصفات قريبة من تبع سويت ناني..:rolleyes:
يعني مثلاً عيونك زرق وبتحط نظارات ، شعراتك فاتحين وقطعتك صغيرة..
حبّاااااااااااااب كتير كتير وقلبك طيّب..
بحسّك أكبر من عمرك، يعني عقلك كبير وبيوزن بلد - واضح من كتاباتك - ..
الحياة علّمتك شغلات كتيرة بالذات كونك عايش بالغربة..
مستمع جيد لجليسك وطويل بال كتير وصديق رائع..
وأهم الشي...
أحلى أخ صغير بهالمنتدى وملك الأفاتر.. ;) ;)


نزار.. :rolleyes:
شب رايق كتييييييييير وجدّي كتير كتير..
بيحب الحوار والنقاش ولمّا يحاورك عنده أسلوب مقنع وجذّاب..
نظرته للحياة غير شكل وتحليلاته منطقية مدروسة..
طويل نوعاً ما ونحيف بس مو كتير..
حاطط نظارة رقيقة فريملس..
شعره قصير وناعم، بني خرنوبي..
عيونه عسلية ووجهه حليق وتقاطيعه فيها شوية نعومة..


سووووووووووس.. ;)
صبية أمورة ومهضومة ولذيذة..
حكياتها حلوين وقعدتها ظريفة وبتحب المزح وحركاتها عفوية كتير..
عندها بكلوريا - هي معروفة للكل - بس عايشة حياتها وبايعتها!!! - يمكن محوشة مصريّات كتير وبدها تدرس بشي جامعة خاصة - :D :D
طولها يعني متوسط لا طويلة ولا قصيرة..
وجسمها وسط لا نحيفة ولا دعبولة..
وشعراتها كاري قصير وعيونها عسلية وبشرتها حنطية..
بصراحة سووووس بحسّك بتشبهي الصورة اللي كنتي حاططتيها قبل..


هاد كل شي لحد هلأ والبقية بعدين عالفضاوة..
ومشان الله يا جماعة لا تواخذونا إذا شي شغلة ما عجبتكن، هيك طلع معي فخدوا الموضوع بروح رياضية... sh:eye
وتحياتي مع المحبّة للجميع...
sh:hi

[نار البحر]

تشااااااو بالهنغاري للجميع

تشاااو شباب دائم

و تشااااااو احلى مسا لاختي ام اللوووووول شكرا الك

sh:hi

لنا عودة ان شاء الله

[wasim]

كاتب الرسالة الأصلية : Sweet_Nany
sh:questio sh:questio



والله تخمين
منيح ياللي زبطت معي :D


بما انك جبت سيرة الاقتباس وسيمو.. كيف بتزبط معك؟؟!!! sh:ohmy

هلا بأم السوس نمبر ون sh:hi


من أجل الاقتباس فهناك ايقونتان تحت كل مشاركة في المنتدى هما http://shabablek.com/vb/images/edit.gif و http://shabablek.com/vb/images/quote.gif ..
اضغطي على زر http://shabablek.com/vb/images/quote.gif تحت المشاركة التي تودين الاقتباس عنها و ستحصلي على الاقتباس جاهزا ..


بس كل شي بكفة ..
و كيف عرفتي أني لابس نظارات بكفة !!!



بركاتك أم السوس sh:ohmy

[ingeneur]

ولو وسيم..
سهلة شغلة النظارة، لأنك قاعد دايماً عالنّت ، يعني لازمك نظارة..
بس ما جاوبتني، تحليلي صح لمّا لأ؟؟؟!! ;)

[wasim]

كاتب الرسالة الأصلية : ingeneur
وسيييييييييييم...
أنا كنت عم اتخّيلك بمواصفات قريبة من تبع سويت ناني..:rolleyes:
يعني مثلاً عيونك زرق وبتحط نظارات ، شعراتك فاتحين وقطعتك صغيرة..
حبّاااااااااااااب كتير كتير وقلبك طيّب..
بحسّك أكبر من عمرك، يعني عقلك كبير وبيوزن بلد - واضح من كتاباتك - ..
الحياة علّمتك شغلات كتيرة بالذات كونك عايش بالغربة..
مستمع جيد لجليسك وطويل بال كتير وصديق رائع..
وأهم الشي...
أحلى أخ صغير بهالمنتدى وملك الأفاتر.. ;) ;)
sh:hi

تحياتي لك أم اللول ...

كل شي قلتيه صح : النظارات .. قطعة صغيرة .. حباب كتير كتير .. قلبي طيب .. أكبر من عمري ( صرت سمعانها شي 200 مرة) .. خبرتي بالحياة كبيرة .. بالي طويل كتير و قلبي بارد .. بس مو تنبل sh:ohmy

[Sweet_Nany]

كاتب الرسالة الأصلية : wasim
تحياتي لك أم اللول ...

كل شي قلتيه صح : النظارات .. قطعة صغيرة .. حباب كتير كتير .. قلبي طيب .. أكبر من عمري ( صرت سمعانها شي 200 مرة) .. خبرتي بالحياة كبيرة .. بالي طويل كتير و قلبي بارد .. بس مو تنبل sh:ohmy

في صفة نسيت اذكرها فيك وسيمو ..

وهي انك..

شرير

:D :D :D

[جرح السماء]

تسلمي يا رب يا sweet_nany أنا كربوجة و معبسةsh:ohmy
بس أنا شب مو بنت معقولة لحقتوا تنسوني :(
على كل حال تسلم إيديك و بانتظار تصورك لي sh:hi

أختي سوس الأفاتر مقدم إذا بدك و لا يهمك بس صار لي زمان بستعملو
و كمان الأفاتر تبعك ظريف :D sh:hi


أما الأخ محمود فأنا شب و كمان أسمي محمود متل اسمك sh:ohmy sh:ohmy ( لا تحس بالاحباط ):D
و ما في لا نظارات و لا بيضا و لا طويلة فعلى هيك بتكون ما ظبطت معك أبدا و مشكور على المحاولةsh:eye

sh:hi

[mahmud-d]

أنا آسف جرح السماء
يعني صار بدنا واحد ثالث اسمه محمود بيطلع لنا كنز
على كل حال المعرف عم يغشنا يعني جرح السماء فورا تخيلت بنت مسمية حالها هيك على كل حال لاتؤاخذني

محمودsh:hi

[Sweet_Nany]

sh:ohmy sh:ohmy

جرح السماء .. انا من البداية مفكرتك صبية...

i'm So SrorRy :o

بس هلء ما عاد فيني اتخيلك الا صبية سووورييييي :o

[جرح السماء]

شو صبية ما صبية سويت ناني خانم؟؟sh:ohmy sh:ohmy
لا الله يخليكي
sh:hi

و كمان تسلم يا محمود و يشرفني أنه اسمك متل اسمي sh:happy sh:hi

[Sweet_Nany]

جرح السماء... بينت ظهور ملامحك..

من هالكم رد ..

أسمراني بس مو كتير .. عيونك سود.. شعراتك سود..
الك شوارب.. متوسط الطول والصحة كمان.. مجذّب ..
كتير مرّسم.. وبتحب الطقومة.. حساس كتير..
قلبك طيب.. سهل انك تنجرح.. بس صعب مداوة الجرح عندك..
لبق..

انشالله صح sh:ohmy sh:hi

[اللاذقية]

مرحبا شباب
يعني من كل المنتدى تخيلني gith
يعني مو معقول والله كانو بيعرفني يعني كيف ظبطت معك gith مالي عرفاني
بس اختي نايس كوين ما قلتيلي مين المذيعة كلشي وما يكون فيصل قاسمsh:ohmy
وينك نار البحر يعني نفدت لانو صورتك بالبوم شباب لك
ومع هيك بتشبه خالد تاجا

gith بيشبه ليناردو دي كابريل

[اللاذقية]

بدي اتخيل اخي AN@S
بتشبه راغب علامة وخصوصا باغنيتو طب ليه وما بتحب البنات وخصوصا أنك كنت مفكرني شب
محب للتحدي واللغة وما في شي عندك مستحيل وبتجيب دوما لنفسك المتاعب

[goldeneagle]

مراحبsh:hi
أنا يمكن لساتني ما قطعت شهر ... بيناتكن ورجيني لشوف ... أو بالأحرى صرلي بس 17 يوم تقريبا ... لسا ما لحأت اتخيل حدا ...
بس يمكن في كتير ناس بلشت كون عنن صورة بمخيلتي...
انشالله شغلة كم يوم أو كم اسبوع اذا ضل هادا الموضوع شغال ، بحط كم تصور ... بس الت لحالي لازم مر ، وشوف اذا البعض متل مو متخيلوا...
ماشالله متل مو متخيل بنسبة 0.2% صح 30% مو غلط و 46% نص نص
بدكن شي؟؟
يلا باي..

[Haloul]

اخ محمود (جرح السماء) بصراحة وقت شفتك انصدمت لأني كنت مفكرتك شخصية مختلفة تماماً عن التي رأيتها....

بس بدون زعل... كنت مفكرتك فتى هلاء طالع من الطفولة للمراهقة و مدلل كتير... يمكن لأنك ببداياتك بالمنتدى كنت كتير تنق و تزعل بسرعة..

حتى وقت شفتك قلت لأحد الأعضاء المتواجدين حينها: هلاء هذا اللي بيكتب بالمنتدى او ابنه هو اللي بيكتب؟:D :D

يعني شفت قدامي شاب طويل عريض و طيار كمان ....... يعني ما ظبطت اي شغلة من اللي كنت متخيلتهاsh:ohmy sh:ohmy

تحياتي لك و لكل اعضاء شبابلك.

[shababdaim]

بسم الله الرحمن الرحيم

السلام عليكم شباب وصبايا المنتدي

شو رايكم نجدد هذا الموضوع .......يللي ما دخلنالو من وقت طويل .......اعتقد انو نحتاج لهيك موضوع نجتمع فيه كل الاعضاء نمزح شوي مع بعض ونوصف بعض كما عملنا في السابق .....والقصد ليس التسليه فقط ....ولكن محاوله التقرب بين الاعضاء .وايضا لترفيه عن بعضنا قليلا وخصوصا بعد الازمه الاخيرة sh:ohmy الله لا يردها .....يعني نوع من جمع الشمل .......والربط الاعضاء بعضهم ببعض .وبصراحه لم نجتمع كلنا مع بعض كما اجتمعنا في هذا الموضوع

ارجو الرد

وسارجع لهذا الموضوع بنفسي .........اذا لم تعودو واصف بعض منكم كنوع من الاستفزاز لرجوع هنا :D واعتبر هذا تهديد صريح :cool:

سلامااااااااات

شباب دائم :cool:

[BOOS]

ممكن فكرة ياشباب شو رأيكن أنو ناخد الموضوع بجدية أكثر ونطورو أكثر أنو
يحط كل واحد منا صورة لحالو ...........يعني مجرد رأي

http://myem.jeeran.com/images/2%20-%20نسخة.jpg

[سامي أنيس]

أنا معكون و باتضار تحريك الموضوع و أول شخص بيكتب بعدي رح يكون مصيرو اني رح اتخيلو ;)

هاتوا لنشوف

[مهندنت]

هههههههههههههههههههههههههههههههه

يعني عن جد يا جمال هاد اظرف موضوع شفته بالمنتدى لحد الآن .

انت من وين طالع جمال ؟؟؟ sh:ohmy

انك تتخيل شو شكل الشخص اللي ماسك معرف ما صعبه كتير كتير كتير ولمى

تتخيله اكيد راح تكون متخيله اما من خلال نوع المشاركات التي يشارك ها

عادة او من خلال صورة المعرف لهذا العضو .

او من خلال انك تروح تشرف لعنده وتطقله صوره فوتوغرافيه ( على اساس انك

مشتقله sh:eye ) وتروح عالبيت وتسجل مواصفاته .

او عن طريق رساله خاصه لهذا الشخص تساله فيها عن جميع مواصفاته لحتى هوه

يجي ويكتبها بهالمشاركه ويقولو الناس عنو انو فلته وعندو حاسه عاشره :p :p :p

غير هيك مو ممكن انك تعرف شو اوصافه .

[سامي أنيس]

كيف بدي أوصفك يا مهند :rolleyes:

مممممممم

ياسيدي انت طولك شي 170

وزنك بالسبعينات

لون بشرتك حنطي

شعرك أسود و أمجعد شوي

لون العينين عسلي

شو كمان :rolleyes:

نمرة رجلك 42 :D


بيكفي هيك هات لنشوف مزبوط ;)

[مهندنت]

خيووووووو انت انو وصفه من الوصفات اللي زكرتهم من شوي استخدمت ؟؟

شكلك الاخيره

لان عن جد اوصافك طالعه 100% sh:ohmy sh:ohmy sh:ohmy sh:ohmy

والله شككتني بحالي .

قلتلي انت وين ساكن ؟؟؟

[سامي أنيس]

مو معقولة يطلعوا صح :eek:

لأنو انا بعد ما استعملت وحدة من الوصفات غيرت فيها شوي مشان التمويه ;) :cool:

بعدين ليش عم تسألني وين ساكن شو ناوي تخطبني من اهلي :D

[مهندنت]

اقووووووول

بلا لف ودوران مين انت ؟؟

لا تكون سامي نابلسي ؟؟

اكيد جايي اخطبك لانك بنت حضرتك ماهيك ؟؟ sh:ohmy sh:ohmy sh:ohmy

بس عن جد المواصفات 100 % مو معقوووووول .:eek:

لك حتى اسمي زكرته الا شوي بالمشاركه .

[nour111]

والله الحق معكم ان تعيدوا تنشيط الموضوع من زمان ما شفنا هل مواضيع الرايقة
مين سعيد الحظ لي بلش فيه م م م م م م م
جورية انا بتخيلها طويلة نحيفة اكابرية تميل الى لبس الرسمي بس ما عم اقدر اتخيلها بل حجاب ليش ما بعرف يعني عندي جورية مو محجبة
الان نار البحر صحيح ان صورته موجودة في الالبوم بس هذا
ما بيمنع الخيال من ان يرسم له صورة صورة لنار البحر و
ليس لجمال
مين بيعرف الالغاز و المغامرين الخمسة انا بحس نار البحر هو
تختخ توفيق ان شاء الله تكون بتعرفو
سويت ناني ليش ما بعرف بس بالنسبة الي هي اسم بدون صورة
يعني ما بتخيلها بس اول شيء يخطر على بالي عند ذكر اسمها هو الافتار
مين كمان مممممممممممممممممممممممم
يلا حاجة الان و اول واحد سوف يخطر على بالي سوف اعود و اتحيله سلام sh:hi

[نار البحر]

مين هااااااااااد تختخ توفيق :D انا ما بعرفه بس ممكن تجيبي صورته من الانترنت اختي نور و تحطيها هون خلينا نشوف نار البحر كيف شكله كما تخيلتيه
على كل حال الصورة الموجودة بالالبوم مش واضحة كتير و لكن بتعطي ولو انطباع بسيط عن شكلي العامي بس على الواقع غيييييييييييييييير
يعني مدعبل و طولي يا دوب واحد متر ووزني شي 100 كيلو :D و عيوني جاحظة و الله يستر من اللي بشوفني رح يفقد ذاكرته بسبب الصدمة و الخوف

طيب باعتبار حابين تفعلوا الموضوع و بناء على راي اختي شباب دائم وبقول المثل اللي بسلم عليك ردلوا التحية باحسن منها و رح اتخيل الاخت نور
مش طويلة يعني شي 165 سم
عيونها بنية و لون بشرتها ابيض بتلبس مانطو و حجاب على الطريقة الشامية يعني ضب عند الرقبة ههههههه وشو كمان صحتها مش زيادة يعني شي 55 كيلو و ملامح وجهها تميل الى الطفولة و البرائة
قد يسالني البعض من اين استوحيت هذه الافكار و انا اقول لكم بسبب الصورة التي اختارتها في توقيعها فاي صورة نرسمها او كلمة نكتبها هي انعكاس لشخصيتنا و استخدامها لصورة الفتاة الصغيرة ذات الملامح البريئة انما هو انعكاس لشخصيتها

تحياتي لكم و لنا عودة

صحيح اختي نور صحيح تصوري و لا غلطان
لا تقوليلي انو طولك شي 190 سم ووزنك شي 90 كيلو sh:ohmy :D